Books

بحث في الدّارجة بالدّارجة التونسيّة ، كتاب عمّ الطّاهر الجديد . وماللّغة باش نعملوا دورة في التّاريخ و الحضارات اللي تواترت على بلادنا ومختلف الجاليات اللي سكنت فيها ومن غادي باش ندخلوا في السوسيولوجيا ونمشيوا للأمثال الشعبيّة ونوصلوا للخرافات ويحكيلنا حتّى على أصل وفصل عزوزة السّتوت . 

اللي يقول Essai ، يقول قراية رزينة آما المرّة هاذي باش يكون خفيف ظلّ علينا ، باش يخلّينا نضحكوا ونتبسّموا ونشمّوا ونذوقوا ونتفكّروا ونحوّسوا  في تونس من شمالها لجنوبها  ويجاوبنا عالعلّة وبنت العلّة والقاضي باش مات . 

ول مرة كي تشوف إسمك على كتاب تحس روحك باش تطير بالفرحة وفي فرد الوقت تحب تبكي، كينك جبت صغير للعالم هذا، فما شيرة منك فيه، فيه من إحساسك ومن روحك بعمرو لا جاء لبالي باش نكتب كتاب، ودايوغ مافما حتى مكتب تنجم تقرى فيه باش تتخرج كاتب، كي الدنيا نهار مالنهارات تكتبلنا حاجة موش قارينلها حساب، والا تورينا وجه متاعنا ما نعرفوهش، آما اللي نعرفو اللي آنا ماخممتش بمخي باش خرج أسرار عائلية، قلبي نطق وعرى عالمخبي وراء البيبان ، وراء التصويرة اللي يشوفوها الناس، حفرت في الشخصيات ودخلت لداخل وحكيت عاللي ما يحب حد يحكي عليه، على ضعف الإنسان، اللحظات اللي يكره فيهم روحو... آما الدنيا ديما تعطينا زوز حلول يا نكملو في الثنية اللي بديناها ونعيشو تعساء ، يا في وسط الثنية نقررو نواجهو رواحنا ومافماش ما أصعب من أنك تواجه تصويرتك الحقانية، تدخل في وسط روحك وتنظف، وتداوي وتتحرق بوجيعة الجرح مالأول ومن بعد يتلم وتقعد السيكاتريس، السيكاتريس هذيكا ثنية حياتنا، ماعادش توجع آما تقعد ماتتنحاش وتحكي حكاية ... الكتاب يحكي ويعالج برشة قضايا، بعضهم ماتكتب عليه شي في تونس إلى يوم الناس هذا، فيه بلايص وديكورات وروايح نعرفوهم الكل وكبرنا بيهم.. لغتو ساهلة آما خدمت فيه على استيتيقا اللغة الدارجة، الدارجة متاعنا لازمها تعيش وتنجم تحمل صور شاعرية مزيانة برشة بعيدا على الكليشيات..

يقولولي العالم هذا مزيان، يكذبوا علينا، العالم هذا ما يشبهليش ما عندوش بوسة الخالة إلي في كف يديا، لا الورد إلي على خديا، ما عندوش لمعت عينيا. ما عندوش السر إلي في رموش كل بنية، العالم هذا كذاب، ما تمشي فيه حتى نصيحة، كل يوم يعطيك طريحة و زيد يغزرلك بعين صحيحة، يلعب بيك، يبيعك و يضحك على شاريك. نحب نغني ما تسرقوش صوتي مني، نحب نطير مع الأطيار، نحب يهديولي نوار و مالرماد تشعل النار